في وصف وضع

كتبت قبلاً أقول:أرجوك..ابتعد عن السعادة قدر الامكان لأن كل ذرة سعادة تحصل عليها سوف تدفع الثمن

وكلما زاد استمتاعك كان الثمن باهظاً وأكثر قسوة

ارتمي في أحضان الحزن واعتاده لكن لا تستمتع به

لانه في حال ذلك سيعد ضرباً من السعادة وستدفع الثمن

فقط اعتاده

اجعل المعاناه هى وضعك الطبيعى ومراسم حياتك اليومية

حينها..وحينها فقط قد تحصل على الثمن على هيئة حفنة من السعادة المجانية

قد.......

منذ عدة ايام جاءنى خبر رسوبى في جميع المواد

وهكذا سأقوم بإعادة العام

للعام الخامس على التوالى لايوجد بحياتى نجاح يذكر

بعدها بيومين

خبر عدم حصولى على اى مركز او جائزة في مسابقة الشعر التى تقدمت لها

في الايام التى تليها دبابيس سعادة تحاول اختراق الطبقة السميكة

التى صنعها الاكتئاب حول نفسي ..فتفشل

تكاد رأسي تشج من كثرة التفكير في أن أستمر في كلية الطب بعد خمسة سنوات من الفشل

ام أنتقل منها لمجال أحبه واعتقد اننى سانجح فيه

جعبتى مليئة بالنصائح المقنعه للرأيين

لا أحتاج نصائحاً ولكننى لا أعرف بدقة ماذا أحتاج

تباً أيتها السعادات الصغيرة..فلتتركينى لحالى!!!

التاج علينا حق

تاج جميل من كوكا الجميلة

انت مين؟

قالوا انت مين؟انس ولا جان؟انا قلت انسجان والمختصر انسان

مين أكتر ست أشخاص بتحبهم؟

بابا وماما واخواتى يوسف وآيه وأمى الروحيه الكاتبة الكبيرة جدا جدا أ/عفاف السيد وطفل معاق ذهنيا عنده تلات سنين زى العسل اسمه يحيي

هل أنت سعيد؟

لو قلت أه أبقي كذاب بس بتمر عليا لحيظات سعادة

لو اجتمعت مع حسنى مبارك في غرفة واحده هتعمل ايه؟

قصدك هعمل ايه ولا ايه ولا ايه

لو معاك مليون ونص تعمل ايه؟

هطبع كل كتاباتى وهحاول اسعد كل اللى حواليا ولو فضل فلوس مش هتجوز

بتحب مصر؟

أنا مصر عندي أحب وأجمل الأشياء

بحبها وهى مالكة الارض شرق وغرب

وبحبها وهى مرميه جريحة حرب

بحبها بعنف وبرقة وعلي استحياء

وأكرها والعن أبوها بعشق زى الداء

واسيبها واطفش في درب

وتبقي هى في درب

وتلتفت

تلاقينى جنبها في الكرب

أكتر شخصية متقدرش تستغنى عنها؟؟

حالياً نفسي

اكتر موقف محرج اتعرضت ليه؟

الحياة بالنسبة لى موقف محرج أرغمت عليه ولا استطيع الفكاك منه

الامنية اللى بتتمناها؟

الرضا..عشان انا مقتنع ان السعادة في الرضا

تمرر التاج لمين؟؟

أمانى

spellz

شمس الليل

كلب وحيد يتنفس

بغض النظر عما قاله الفيلسوف (سينيكا)أنه لا يمكن أن يعيش الانسان سعيدا و وحيدا في الوقت ذاته ..فأننى أكون أفضل حالا وأنا وحدي وأفضل حالا هنا لا تعنى ما قد يتبادر الى ذهن البعض من راحه وسعادة وهناء واستمتاع..بالطبع لا..ولكننى أنتج أكثر ..تفكيرى يكون أكثر تنظيما..أكتب أكثر..أدخن أكثر..أأكل أقل..أنام أقل..أعمل أفضل..أحس أن قراري كاملا من رأسي ..تبتعد عنى-ولو قليلا-أشباح التسيير- الموجوده شئت أم أبيت..يسقط من على كاهلى نير المسئوليات التى أزرح تحت وطأتها دون ذنب يُذكر سوى أنني الأخ الأكبر ..تهمه معقولة..أليس كذلك؟؟..حقيقة أنا لست طماعا..لا أطمع في سيارة ولا أموال مكدسة فى البنوك..ولا أولاد طائعون أو غير طائعون-لا أرغب في أبناء من الأساس-ولا زوجة صالحة أو غير صالحة..لا أطمح سوي في عمل يتفق مع ميولى ومواهبى المزعومه..أحبه لأخلص له وأتعب و أجد فيه..لا أرغب في دخل أكثر مما يوفر لى العيش وشراء الكتب والترفيه من حين لآخر ..وامرأه تحبنى مثلما أنا..تحبنى نصف ما سأحبه لها..وتخلص لى مثلما سأخلص لها..عقليتها عالية ومتطورة لتستوعبنى..لا أريدها صارخة الجمال..تتفهم أنني أريد أن اكون وحدى من حين لآخر ..ليست بالطبع كزوجة (نيكوس كازنتزاكيس)مؤلف زوربا اليونانى وغيرها من الروائع والتى لم تكن تراه سوى عشرة أيام في السنه حسب اتفاق أبرموه سُمى بعهد الأيام العشرة ..تُري لو احترقت الشقة..أو وقع البيت ..ماذا سأنقذ غير كتاباتى!!..

دعوة عامه

أكيد طبعا سمعت عن الفرق الموسيقية المستقلة..وممكن تكون حضرتلهم حفلة أو أكتر ..أكيد سمعت عن اسكندريلا..والجميزة..وطمى..لو تحب تقعد معاهم ..تسمع موسيقتهم المختلفه..تتناقش..تفهم ..تستمتع..هما هيكونوا موجودين يوم الاتنين الجاى الساعة 7 مساءا في مركز الدراسات الاشتراكية 7 ش مراد في ميدان الجيزة..والدعوة عامة..تعالى متترددش ..هتستمتع بموسيقى واغانى جديدة وأصيله وجميلة ومختلفه..ولو مكنتش جربت قبل كده..جرب..مش هتخسر حاجه..بالعكس ..أكيد هتستمتع جدا

إرجعوا إلي الله

سمعت من كام جمعة كده خطبة قمة الكوميديا السودا..الخطيب أغلب الظن انه لم يتجاوز التعليم الابتدائي ويصرخ((صحفي جاهل وصحفية جاهلة تافهه مهما حصولوا على دبلومات وماجستيرات ودكتورات فهم جهلاء بكتاب الله وسنة رسوله ..يسبون صحابة الرسول ونساؤه وينكرون الشفاعه ..النبي سيد خلق الله رغم أنف الحاقدين..رغم أنف رغم أنف رغم أنف-مش غلطة مطبعية هو كررها تلات مرات-الصحافيين الجاهلين..والله لو كان عمر بن الخطاب حياً لقطع رؤوسهم جميعاً ..ولكن الله سيقتص لنبيه..انظروا للجو الغير مستقر؟؟..هذا يحدث لأن الله يغار علي دينه..هذه ملصة أذن من الله لعباده..يريد ان يذكرهم أنه حي لا يموت..ليس هناك شفقة أو رحمة بمن يسب الله ورسوله ..ليس لهم إلا قطع الرقبة..التشرد والتخلف في دول المسلمين سببه أننا ابتعدنا عن الأمر بالمعروف ..وعندما تركناه حل بنا غلاء العيش وضيق الرزق ورُفعت الصحة والبركة عن الأولاد ورأينا الأبناء يسبون الآباء والأمهات ..حب الدنيا رأس كل خطيئة ..هزمنا الغرب الآن بالتكنولوجيا المتقدمة..جربوا الحرب فلم يفلحوا-واخدين بالكوا من فلم يفلحوا دى-المخدرات فأصابوا قليلاً-حطلي خط تحت قليلاً دى وزغرطي يا أم قرني-فاخترعوا التكنولوجيا المتقدمة الحديثةخصيصا-كمان زغروطة عشان خصيصا-لأجل تضييعنا..فهذا الدش وهذا الانترنت سبب فساد الشباب..إرجعوا إلى الله)) تقريبا انتهت الخطبة والكلام دا ماعدا تدخلاتى كجمل اعتراضيه الخطيب قاله بالنص..كل التحليلات المناخيه والتربويه والحربيه والاقتصاديه دى من عنده واى طبع او نسخ منها يعرض صاحبه للمسائله القانونيه ..حقوق الطبع محفوظة لسيدنا الشيخ .. وانا بالنسبه لى... لاتعليق....

dog..................toooooooooooooor

من أول ما الأمور يدخل ثانوية عامة وتبدأ عينة تدغشش من كتر الحفظ والصم ف سنتين مالهمش اى لازمة أو معنى ولو اتلغوا حال التعليم ممكن يبقى فيه أمل ..بابي يجيبله نضارة وأول ما مامى تشوفه يا سلام يا بقلظ دكتور والله..وينشكح بقلظ ويفشخ ابتسامته ويديها حفظ ويديها صم ويديها غباوة كمان وكمان ومادام دى التلات مفاتيح الذهبية للثانوية العامة المصرية..بقلظ يجيب أعلى مجموع..ويدخل طب ..ويا حبذا لو طب القصر العينى ..حلم كل طالب معاق ذهنيا..ونقول ليه بقا معاق ذهنيا ..دلوقتى جوه كل واحد فينا مواهب وملكات في اللى اكتشفها وفي اللى اتنيل على عين أهله ولسه بيحاول وميتهيأليش إن أى واحد هوايته انه يفتح خراج مثلا أو يعمل بواسير ..تانى حاجه هى الحكاية ناقصه ضياع عمر!! مش كفايه تلت عمرك أو أكثر ضايع نوم تضيع سبع تمن سنين عشان تطلع ولا حاجه ليه؟؟..ايوة دى مش مبالغة ..طالب الطب الشاطر المتفوق اللى معادش ولا سنة ودى مش نسبة طاغيه يعنى..بيتخرج بعد سبع سنين ولا حاجه ويبدأ يتعلم ..زغرطى يا أم قرني ..وبعدين اللى بيحلم بالحياة الجامعيه اللى بيشوفها فى الافلام والمسلسلات ينسي خالص انه ممكن يلاقي حاجة زى دى في كهوف الطب العتيقة أولا مفيش وقت لحاجة اساسا اذا كنت بتذاكر أو مكنتش ..ثانيا البنات مش فاضيه تغسل وشها عشان تفضالك وتحط أحمر وأخضر وتهتم بنفسها ..انسي الصورة دى تماما ..واذا كنت لسه عايش ف دور ان الدكتور ليه هيبه وانه شغله مضمون والكلام دا ..انسي يا حبيبى الكلام دا كااااااااااااااان زماااااااااااااااااااااااااااااااااان وبعدين الناجح ناجح في مجاله يعنى أحمد زويل ،نجيب محفوظ،جمال حمدان،ابراهيم عيسي،احمد فؤاد نجم،عادل إمام،ايزابيل الليندي،سهير المرشدي ..ومتاخدش ف بالك من الامثلة هما دول اللى جم على دماغي دلوقتى ..ناجحين دول ولا مش ناجحين ..حد ف دول دكتور وبعدين نبطل نكذب على بعض بقا ونظلم الدكاترة خريج كليه طب مش دكتور ..دا حتة طبيب..الدكتور اللى ياخد الدكتوراه ..الى كل من نجا من كليه الطب ..أنا فرحانلكم ..إدعولى أحصلكم..

بتغر واسميها قصيدة

بتعب

لمّا يطول اللف

واتغرب جوه مدينتي..

وأجري وأجري

لما أدوخ

أقف

متحير من حيرتي

واطلع وادخل

جوهblogs

شايله آهات

..ولاد وبنات

والحبر

يوم ما بيعصي ف ايدي الحرف

أتجنن

واقتل نفسي يوماتي بصبري

بسكوتي الشارد

بكياني البارد..

مش هتحمل

اتعب اكتر..

ايه يا حبيبتى

ليه اتأخرتي؟؟

دا الصبر دبحني بسكينته البارده

وانتى بعيد

وداسنى اليوم بساعاته

والشهر بأيامه

والسنه بشهورها

وانا قلبي حديد

صدى

وعدى

حدود الاحتمال والممكن..

بتعب

لما يزيد التف من الدنيا عليا

واهى لغوه جديده

بتتكلم بيها

..وانا مش فاهم كالعاده

وكتابى مع الحزن كتبته

علي إيد مأذون مخصي

متخفي ف جلابيته

ويوميها إختار نور عيني ماهيته

وانا راضي أكل بالجزمة

واتعب واتعب

يمكن ألقي

بس انتى

كتير إتأخرتي.

وحده

عبثت يده بخصلات شعره المتروك طويلاً بلا عناية،ثم حك ذقنه النابته ونظر ملياً في عينيها ثم أردف:قلت لكي لا أعرفها جيداً..قالت :بل قلت لا تعرفها من الأساس..رد:لم أقل من الأساس..ردت::ولم تقل جيداً..قال:ماذا ترديدين؟..قالت :من حقي أن أفهم..قال:من أعطاكي هذا الحق؟؟..قالت:ألم تحب من قبل؟؟..قال:بل انتي التى لم تحب من قبل ولا حتى الآن!!..أردفت بعصبية:من أدراك؟ومن أفهمك؟..جاهل..رد في خشونة:أنانية..شكاكة..نظرت أمامها بعد أن أشاحت بوجهها عنه:زير نساء...مد يده الي وجهها...ثم التحما في عناق ساخن تلته قبلة همجية عمياء..قال:أحبك..قالت..أنت كل آلهتي..فرك عينيه بيديه جيداً ليتأكد من وجوده وحده..ثم ابتسم ابتسامه عريضه..فتجهم..فنام...

حصاة غريبة في نهر أغرب

انا لحد دلوقتي مش عارف بالظبط انا عملت المدونة ليه ؟؟..يمكن حسيت ان المجتمع الإفتراضي دا فيه صدق و ونس وحنان أكتر من الواقع ..يمكن علشان مش لاقي حاجه أعملها؟؟..بس لا في حاجات أسهل ممكن تتعمل ..بدل المسئولية الفظيعه اللى حسيت بيها اول ما المدونة بدأت تظهرأدامي ..هحاول على أد ما أقدر ان اللى يدخل يستفيد أو يستمتع

أو يفكر بشكل مختلف ..أو على الأقل ميقررش إن دى تكون المرة الأخيرة اللي يدخل فيها .. هحاول .. مجرد محاولة !!

قال المسيح:هل استطاع سليمان بكل ملكوته أن يرتدي أجمل

مما ترتديه زهرة متأنقة..!!

طيب بزمتك..عمرك شفت أشيك من كده؟؟

صديق في التجربة

قال:أحببتها..

قلت:أتركها

ولا تنضم لحزب الأغبياء..

قال:لا أستطع

قلت:جنتها لا يدخلها إلا الأتقياء

ولقد أدمنّا لعبة التمرد.

ثم تعب من الكلام..ونام...

كطفل فرغ –لتوه-من تلقي الإرضاع.

لم أود حينها إلا

أن أخترق زجاج نظارته

المحاط بالإطار الأزرق المعدني اللامع

ومنها إلي عينيه كالشعاع

لأعبث في عقله الباطن كالرعاع

وأستقر في حلمه الحالي

وأقتلها أمامه..في منامه

فيصحو..ليتلقى فيها العزاء.

إذن نيابة

قبضت اليوم

علي ابتسامة

مُتلبسة علي وجهي بالحضور

لكنني لم أستطع أن أؤكد

أنها من القلب..!!

عيد ميلادي

21مايو
يوم غير ملائم للولادة
....تتجلي قدرة الخالق في مشهد لا يُنسي..حيث تسطع الشمس مُعلنه بداية يوم جديد وإسدال الستار علي سابقه بكل ما فيه ..لكن عناد القمر يأبى هذا الإسدال ..فيظهر في سماء النهارمتحدياً الضوء والسحب وكل البشر... اجتماع الشمس والقمر في سماء واحدة منظر خلاب تخشع له قلوب المؤمنين ويُقدح به زناد قريحة الشعراء ..يستمتعون بالمنظر لأنهم ينظرون من أسفل... من بعييييييد...لا يشعرون باحتدام الصراع الدائر بالأعلى .. لا يشعرون بكم المعاناة التي عاناها القمر ليصمد في وجه جبروت الشمس .. ولا يعلمون بكم الخزي والعار الذي يُندي جبين الشمس في عليائها....
....حين تبدأ كل النجوم والكواكب والأفلاك في شحن قواتها لإفراز مواليد برج الجوزاء المتقلبين المزاجيين الهوائيين..يوهمهم أصدقائهم- من الأفلاك الأخرى المسئولة عن شحن مواليد برج الثور بالعناد - بالتراجع.. ولكن هذا في الظاهر فقط ..أما في الباطن فهم يعدون خطة انتحارية جهنمية هجومية أخيرة ..يأبوا أن يرحلوا دون أن يتركوا بصمة
تدميرية ..وفي يوم 21 مايو يحدث الصدام ..بينما يتم الإنزال السريع لمعدات الجوزاء في قلوب وعقول ضحايا هذا اليوم ..يهجم جيش الثور بكل قوته كترنح المصروع .. هجوم فوضوي باطش ..لا يتراجع جيش الجوزاء وجيش الثور ليس عنده ما يبكي عليه فنهايته محسومة –شاء أم أبى- في نهاية هذا اليوم..وبينما تدور رحايا المعركة بلا رحمة..يتساقط ضحايا هذا اليوم من أرحام أمهاتهم..والأقارب حولهم فرحين مهللين ..يستمتعون بالمنظر
لأنهم ينظرون من أسفل .. من بعييييييد..لا يشعرون باحتدام الصراع الدائر بالأعلى ..فطوبى للمتشبثين بجدر الأرحام حتي انتهاء هذا اليوم.........