خيانة

بخونِك..
أما ابص لواحدة تانية
أي بصة
مش مهم تكون بمعنى..

أما أقول الدنيا فانية
وانتي فيها ..

أما أشوف ف سمايا قمري
وانتي جنبي..

لما أقولك أي كلمة
غير "بحبِك"..

أيوة خُنتِك
يوم ما حبيت ملمس إيديا
قبل ما تلامس إيديكي..

يوم ما شوفت الدنيا وحدي
بره بوابة عينيكي..

أيوة خُنتِك
إني مقلتلكيش "بحبِك"
ألف مرة كل يوم..

و مين هيزهق
من كلام الحب اللي
مولود لكنه نازل بيجري
من جوه القلب الحزين..؟؟
اللي فرحه يوم لقاكي
فرحة العيد الكبير..

قالوا نثر
أو عمودي
أو بقافية
معرفش غير الشعر إنتي..

أيوة خُنتِك
يوم ما عقلي زي الاهبل
فكر انه حب قبلِك..
يوم ما قلمي كتب لغيرِك..
يوم ما قلبي حاشها عنِك
حروف "بحبِك"..
أيوة إنتي
اللي عشانها إبيَض قلبي
والنيل ضحكلي
وقاللي يابني
لو فكرت تنط فيّا
هبقى أرض
مش عشانك
بس لجل عيون حبيبتك..
معجزات ما بين ايديها
و اما تمشي
ورد يطلع تحت منها ..

أيوة خُنتِك
لو فكرت ف لحظة إني
مرة خُنتِك...!!