الجمعة، ١٩ مارس ٢٠١٠

قريباً

السبت، ٢٦ سبتمبر ٢٠٠٩

المية طماعة



بردان يا بردانة


والوحدة سعرانة


ومش لاقي مكان للاختباء..


ورفضت


بصوت غيرك أتدنس..


ورفضت


حتى بالمية أتونس..


المية..


من يوم ميلادها طماعة..


المية قطة ف الطاعة ..


وأنا عطشان..


هتسرق خلاياكي من جلدي


وهتسيبني


بردان..


بردان يا بردانة


والوحدة سعرانة


ومش لاقي


مكان


للاختباء..

الاثنين، ٢١ سبتمبر ٢٠٠٩


اهداء: لكلمة"كفاية" اللى بتفضل واقفة ف زوري لحد ما تقرب تخنقني .. فتنفجر..


متعاملينيش على انى عاقل

متحاسبينيش على اني مش..!!

مجنون عشان

مكدبتش

ف يوم عليكى..

وانتي تموتي

ف البلوفر الجميل

المعمول مخصوص عشانك

خيطة كدب

وخيطة درب من النفاق..

واعرفي

اني طلعت-وغصب عني-

أول سلمة

من سلالم الفراق..

ولما همشي

هتهرب تفاصيلي مِنك

واحدة واحدة..وبالتصوير البطيء

وزي اللي قبلك ما عملوا

هتشيليني الذنب كله

كله كله

وهتفتحي الألبوم العتيق

هتلاقي صورتي فيه

من غير وش!!

متعاملينيش على اني عاقل

متحاسبينيش على اني مش..!!

أنا مرايتك

فاسمعي صوتي القديم

وانسي هلاوسك

والصوت المُزيف

اللي عامل انه ضميرك

هو آثم

وانتي أسفة

هو حازم

وانتي جزمة

وانا

العصب العاري الوحيد

انا

الانسان الباقي الطريد

انا

الحلم المتلون البعيد

انا

الحاضر..انا بكره السعيد

قميص نومك الاحمر الجديد

البسيني

وافركي تحت الغطا

والصهد اللي طالع من خدودك

قادر يأمر الرغيف

يطلع صباح

لحظة طلوع جسمك

اللي حافظ ملامحي

من تحت الغطا

طاهر عفيف

والمعدة اللي كانت ف يوم مخدة

قارصها جوع

فتملي رغيفك مش..!!

متعاملينيش على اني عاقل

متحاسبينيش على اني مش..!!

وايه اللي يحصل

لما أتعب م الحفا؟؟

وايه اللي يجرى

لما أطلب يوم دفا؟؟

لما الوم اللي عفا

وقلبي واقف ع الشَفا

رافض شِفا

زهد الحياة المُقرفة..

وكل ماجي اكتب قصيدة

يطلع بُكا

وكل ماجي اشكي واقول

يطلع بُكا

ملعون أبو الحب اللي خلى

عيني

تنشف منها الدموع

ملعون أبو العشق اللى خلى

قلبي يسوع

مصلوب على

ذكرى شفايفك

ملعون أبو الفُرقة اللي خلت

صوتي

بعد ما امشي

تقولي عنه غش..!!

متعاملينيش على اني عاقل

متحاسبينيش على انى مش..!!

الاثنين، ١٤ سبتمبر ٢٠٠٩

كلمني شكراً



حبيبتى افهمي بس اللى أنا بقولهولك .. اسمعيني طيب .. هو انا بقاطعك كده وانتى بتتكلمي ؟؟ اسمعيني .. أيوه هي عدة التليفون البيضا اللي بره .. سيبك خلاص من العدة الحمره الصغننة اللى انا جبتهالك لما شكّيتي انهم بيسجلوا المكالمات .. سيبك منها .. ارميها خبيها ابقي اديهالى .. مش دا المهم .. المهم دلوقتى العدة البيضا .. لازم تكلميني منها عادى .. لأ يا حبيبتى مش عادى ف المعادى ..... ولا عادي ف الزبادي .. وبعدين احنا هنخش لبعض قافية طول الليل ولا ايه ؟؟ معادي ايه وزبادي ايه ؟؟ انتى جعانة يا حبيبتى .. أه .. أه بجد ولا بتهزري ؟؟ .. يا حبيبتى .. ابعتلك ديليفري ؟؟ مش هينفع ؟؟ طيب .. هو الفلوس اللي معايا مكانتش هتكفي اساسا .. بتضحكى ؟؟ اضحكي اضحكي ..المهم .. دلوقتى أنا عاوزك بليل لما تبعتيلي كلمني شكرا واتصل بيكي ع الارضي تردي من العدة البيضا اللي بره اللي انتى بقيتى متأكدة دلوقتى انهم بيسجلوا من عليها كل المكالمات .. .........أيوة انا عاوزهم يسمعونا .. ويسمعوا كل كلمة بنقولها .. كل حرف .. كل آهه .. كل تنهيده .. وكل بوسة ف الهوا .. وكل حضن خيالي بنتصبّر بيه على أمل ف حضن بجد .. حضن بحق وحقيقي .. تلمسينى فيه وألمسك ..تدخلي جوايا .. واحتويكي .. أحتويكى اوي ..أضمك .. نفسي أضمك .. نفسي أحس الاحساس دا معاكى أوي .. ياااااااااااااه.. اتنهدي حبيبتى .. اد ما تنهيدتك دي بترمي حجر كبير على قلبي .. إلا أن انا بموت فيها .. بعشقها .. بحسها جزء منك بيجيلي .. بيجيلي بجد .. بيدخل جوايا وبحسه .. زي بالظبط اتنين عُشاق ف لحظة وصول .. واحد يكّمل فراغ التاني .. وحتة البازل الناقصة تركب مكانها .. تركب مكانها بالظبط ..شفتى تنهيدتك بس بتعمل فيا ايه؟؟ لا .. متبكيش يا حبيبتى .. متبكيش دلوقتى.. كل دمعة منك سيف ف قلبي .. سيف ف قلبي لحد مقبضه .. سيف حامي أوى وسخن نار .. وهو داخل قلبي مش بيقطع ف لحمه بس .. لا .. بيشويه كمان .. بلاش دموع يا حبيبتى .. بلاش عشان خاطري .. ولا أقولك .. حوشيهم .. حوشي دموعك اللى بتدبحني لبكره .. لما تكلمينى من العدة البيضا اللي بره .. اللي يسجلوا بيها المكالمات .. عشان بعد بكره الصبح لما يصحوا قبلك .. ويروحوا يشوفوا المكالمات اللي سجلوها ..
يسمعونا .....................
يمكن.....................
يحسوا بينا
يمكن ...................

الخميس، ٢٠ أغسطس ٢٠٠٩

عرفيني


عرفيني

فرّحيني بانتصاري و اوجعيني

هل أنا

موتت فيكي

بس ألف حاجه

جوه منك..

ولا أكتر؟؟

شيلي إيدك

سيبي سيل دموع يمطّر

وانتى مالك؟؟

عمر وقف دموع ف يوم يريح

ولّا حتى انهمارها ؟؟

همّليها

اسكبيها ف عقر دارها

جلد كفي

واشكي حالك

اشكى حالك عرفيني

فرحيني بانتصاري و اوجعيني

هل أنا موتت فيكي

بس ألف حاجه

جوه منك

ولا أكتر؟؟

الأحد، ٩ أغسطس ٢٠٠٩

حلم أول على وشك التحقق


صباح الخميس 13-8-2009
بمكتبات وسط البلد
وبدرخان بالهرم
وآفاق بالقصر العيني
وتباعاً بالمحافظات

وبنفس اليوم في السابعة والنصف مساءاً
حفل توقيع الكتاب
بمكتبة بدرخان
شارع ستوديو الأهرام-أمام بيتزا كينج الهرم-الهرم-الجيزة

في انتظاركم جميعاً

الاثنين، ٢٧ يوليو ٢٠٠٩

وبدأ العد التنازلي


أخيرا

وبعد طول انتظار

كتابي الأول

كود ساويرس

قريباً بالأسواق