مهما حصل
مهما حصل
ولو الطوفان وصل
متقدريش ف يوم تنسيني..
ولو الطوفان وصل
متقدريش ف يوم تنسيني..
ولو قالولي إن فيضان الهلاك
طالع من الأقدام للجباه..
صورتي ف خيالك
صوتي ف ودانك
والقوة من قلبي لقلبك
همّا أطواق النجاة..
ولو قالولِك خلاص .. دا فات
والحي أبقى م اللي مات
أو حتى قالوا خلاص دا باع
وسابك لوحدِك للضياع
إوعي تصدقي.. إلا اليقين
الغرقان بدموع حنين..
مهما البعاد طال أو فصل
بينى وبينك خطوتين
والدنيا عليها لينا دين
و أحلفلك بدل الميت يمين
يحلف لساني بسحر عين
إن العيون والقلب همّا اللي اختاروكِ
و إوعي ف يوم تنسيني
أحسن يطردوكِ
من جنتي..
و ساعتها تلقي الشمس حامية
بعد ما وقعت شجرة وارفة
أغصانها حضني ولهفتي..
ولو جابولك يوم جثتي
متصدقيش..
هتلاقيني
دايماً وقت ما تعوزيني ..
ولو قدرتي تعِدي كل النجوم
أو تعَدي البحر
من غير ما تبلي الهدوم ..
مستحيل تنسي ف يوم
اللي قالك:
مهما حصل
ولو الطوفان وصل
مقدرش أنساكِ أبداً ..
مهما حصل ..
هناك ٧ تعليقات:
حورس
رائع دائما
ونورت مدونتك يابنى متبقاش تغيب
كل سنه وانت طيب ورمضان كريم
انا ليا فانوس عندك من رمضان اللى فات على فكره ههههههههههه
كان تقريبا تانى تعليق ليا فى مدونتك هنا
الايام بتعدي بسرعة جدااااااا
تحياتى لك
إن العيون والقلب همّا اللي اختاروكِ
و إوعي ف يوم تنسيني
أحسن يطردوكِ
من جنتي..
و ساعتها تلقي الشمس حامية
تعبير جميل جدا وخصوصا ...ان الحب بيكون بالعين والقلب
بالعين ....لانى بحس ان العين بتعبر كتير عن الانسان وعن اعماقه وعندما نحب بنعشق عيون من نحب وايضا عيونناهى التى تختار فى الاول
ثم ...القلب والقلب له احكام فى ان بنبض لانسان واحد يختاره من وسط الكون
من غير معرفه او سبب للاختيار
ولكن ...فى الاخر لانتمسك الا بمن يتمسك بينا
استوقفتنى هذه الابيات لانى حسيت فيها بمعنى الحب الحقيقى
تحياتى
ليست الايام هى ما يمر بسرعة
بل السنون
نعم
كما قالها الشاعر ابراهيم داوود فى احدى مقالاته
بالرغم من الايام تمر ببطء
الا ان السنون تمر بسرعة
اشكرك كثيرا
نبضات :
طبعا التعليق السابق للجميلة رحيل
اما العزيزة نبضات
فأوقفتنى جملة لديها لو حدثت كما تقولها بمنتهى البراءة لتغير تاريخ الكون ولم يكن العالم على شكله الحالى على الاطلاق على الاقل كان عدد الجرائم سيتقلص الى العشر
لا نتمسك الا بمن يتمسك بنا
اتمنى ان الامر بتلك البساطة
مجرد تمنى ...خائب
ولو جابولك يوم جثتي
متصدقيش..
هتلاقيني
دايماً وقت ما تعوزيني ..
ولو قدرتي تعِدي كل النجوم
أو تعَدي البحر
من غير ما تبلي الهدوم ..
مستحيل تنسي ف يوم
اللي قالك:
مهما حصل
ولو الطوفان وصل
مقدرش أنساكِ أبداً ..
رااااااااااائعه بجد ما شاء الله
سلوى:
الف شكر على الزيارة وعلى التعليق
واتمنى تكرارهم..
مش من عادتى ان ااعد اقرا مدونه بأكملها من اولها لأاخرها ولفت انتباهى حاجات
انت قليل الكلام اوى ودى حاجه بحترمها فيك وثقتك فى نفسك شىء مفروغ منه
اقصد قوى وانت بتحب
بس مش بتقدم تضحيات
يعنى (الحال كما هو عليه...والواقع يتكيف ان اراد)
إرسال تعليق