الاثنين، ٢١ سبتمبر ٢٠٠٩


اهداء: لكلمة"كفاية" اللى بتفضل واقفة ف زوري لحد ما تقرب تخنقني .. فتنفجر..


متعاملينيش على انى عاقل

متحاسبينيش على اني مش..!!

مجنون عشان

مكدبتش

ف يوم عليكى..

وانتي تموتي

ف البلوفر الجميل

المعمول مخصوص عشانك

خيطة كدب

وخيطة درب من النفاق..

واعرفي

اني طلعت-وغصب عني-

أول سلمة

من سلالم الفراق..

ولما همشي

هتهرب تفاصيلي مِنك

واحدة واحدة..وبالتصوير البطيء

وزي اللي قبلك ما عملوا

هتشيليني الذنب كله

كله كله

وهتفتحي الألبوم العتيق

هتلاقي صورتي فيه

من غير وش!!

متعاملينيش على اني عاقل

متحاسبينيش على اني مش..!!

أنا مرايتك

فاسمعي صوتي القديم

وانسي هلاوسك

والصوت المُزيف

اللي عامل انه ضميرك

هو آثم

وانتي أسفة

هو حازم

وانتي جزمة

وانا

العصب العاري الوحيد

انا

الانسان الباقي الطريد

انا

الحلم المتلون البعيد

انا

الحاضر..انا بكره السعيد

قميص نومك الاحمر الجديد

البسيني

وافركي تحت الغطا

والصهد اللي طالع من خدودك

قادر يأمر الرغيف

يطلع صباح

لحظة طلوع جسمك

اللي حافظ ملامحي

من تحت الغطا

طاهر عفيف

والمعدة اللي كانت ف يوم مخدة

قارصها جوع

فتملي رغيفك مش..!!

متعاملينيش على اني عاقل

متحاسبينيش على اني مش..!!

وايه اللي يحصل

لما أتعب م الحفا؟؟

وايه اللي يجرى

لما أطلب يوم دفا؟؟

لما الوم اللي عفا

وقلبي واقف ع الشَفا

رافض شِفا

زهد الحياة المُقرفة..

وكل ماجي اكتب قصيدة

يطلع بُكا

وكل ماجي اشكي واقول

يطلع بُكا

ملعون أبو الحب اللي خلى

عيني

تنشف منها الدموع

ملعون أبو العشق اللى خلى

قلبي يسوع

مصلوب على

ذكرى شفايفك

ملعون أبو الفُرقة اللي خلت

صوتي

بعد ما امشي

تقولي عنه غش..!!

متعاملينيش على اني عاقل

متحاسبينيش على انى مش..!!

هناك ٤ تعليقات:

------ يقول...

انا التعليق الاول


ولا اييييييه

------ يقول...

احم احم احم

واد يادوقدق

هات مية نرش العتبة

يافتاح ياعليم يارزاق ياكريم

------ يقول...

ايه الجمال دا

كلماتك حلوة

سلمت يداك

r يقول...

حورس
كيفك؟
كل سنه وانت طيب

النص عفوى وجميل لما يتقرى على بعضه
بس بالاجزاء مش عارفه انت قاصد تسب فيه؟
جزمه؟ وملعون ابو؟ الكلام دا غريب كتير

انت بتكتب بشكل مختلف بس صراحه ساعات
بتكون غير مفهوم

انا لسه بتابع لعلى افهم
دمت اعقل وبخير