أسباب وجيهة للعشق
بعشقِك..
لجل التفافة الزمن اللولبي
اللولبية..
لجل من باعوا القضية
لجل أكبر سلطانية..
بعشقِك..
لجل الحنين
المحفور-وبخط واضح-ع الجبين..
لجل السلم والتعبان
والطغيان
وارتعاشة "العرش" الجبان..
والشمع اللي سادد كل الودان
والشمع اللي مطفي ف قلب الشمعدان
والانسحاب قبل ما يفوت الأوان ..
بعشقِك..
لجل الفصول المهزلية
لجل التكرار البذيء للمسرحية
أه من عيونك ..كهربية..
بعشقِك..
لجل العيون المرسومين
والرموش حول العيون المرسومين
والحواجب السيفين
فوق الرموش حول العيون المرسومين..
بعشقِك..
لجل الضمير اللي فسد
لجل الرواج اللي كسد
لجل السنان الواقعة
من بق الأسد..
يا مرشدي
امنحني أوسع مغرفة
أغرف كنوز المعرفة
وأرجع وأقول:
بعشقِك
لجل استدارة الجسد
ملقيتش غير سورة المسد
أدرأ بها عنه الحسد..
بعشقِك
بعشقِك
بعشقِك....
هناك ١٨ تعليقًا:
عمر ما كان فيه
مع احترامي لكل دة
اسباب وجيهة لأي عشق
جميل
يا مرشدي
امنحني أوسع مغرفة
أغرف كنوز المعرفة
وأرجع وأقول:
بعشقِك
.................
بعشقِك
بعشقِك
بعشقِك....
إله السما تسلملي
ويسلملي كل ذرة في كيانك
وروحك دايما تكون معايا
وحواليا وجوايا
بعشقك...
مصطفى سمير:
اتفق تماما مع وجهة نظرك
فالعشق سيتهدم ان فكرنا في البحث عن الاسباب الوجيهة
وهو ليس دراسة بخثية حتى يقوم على اسباب منطقية..
ولكنى اختلف مع فهمك للنص
او انك قد اكتفيت بقراءة العنوان
فالعنوان على سبيل السخرية
والمجاز المعاكس ليس الا
وع العموم
شكرا يا سيدى على تعليقك
إلي من أعرفها:
هل تعمدتى عدم الامضاء
ام انك وقعتى بخروف كلمة بعشقك؟؟
كم أرغب في اخفاؤك عن كل العيون
وضمك واحتضانك وصهرك بداخلى
اعلم انى طماع
ولكنى زاهد في كل العالم الاكِ
اشتقتكِ حقا
اشتقتك كما يكون الاشتياق
كلي إليكِ
كلي لكِ
كلي لأجلكِ
يا الله
وحدك تعلم بما تصرخ به خلاياى من أمنيات
ودعوات
وابتهالات...
يا الله
سأدعوك وأعلم انك قادر على الاستجابة
ولن أقول إلا
ربنا يقرب البعيد..!!
الرائع حورس
لجل العيون المرسومين
والرموش حول العيون المرسومين
والحواجب السيفين
فوق الرموش حول العيون المرسومين..
كم انت رائع دوما
تحياتى وتقديرى وتمنياتى لكما بكل الخير ودوام الحب
ممكن اصفق؟
اصل كلامي هيخرب المعنى........
أنت موهبة مش عادية بجد
بأهنيك على كلماتك
و بأهنيك أكتر على معاني كلماتك
تحياتي
KING TOOOT
اممممممممم
لنمتن لجوائز السماء
عن العشق نتحدث
اعتقد انك تعشق فى الحقيقه فعلا
والعشق مالوش سبب
لانه مرض
العزيز حورس
اشتقت لكلامك
فعلا مهما قلنا و حاولنا نبرر عشقنا برضه مش حنلاقي
العشق حلاوته في غموضه
لما بنفكر فيه بيفقد رونقه
كل شم نسيم و انت طيب
عامل ايه في الكليه؟تمام؟انشاء الله يارب دايما بخير صديقي العزيز
تحياتي ليك حورس
حورس
اسفه على التأخير بس كان غصب عنى
النص جميل جديد فى اسلوبه كلماته محيره ويمكن تتفهم بأكتر من طريقه
بس النهايه تؤكد انها لحبيبه محفوره فى الوجدان
ربنا يبارك فيك ويزيدك ابداع
تحياتى لك
ra7eel:
الجميلة رحيل
كم هو رائع قلبك الأبيض
وكم هى هادئه ورقيقة تعليقاتك
اشكرك على دعواتك الجميلة
واتمنى لكِ دوام السعادة
سمكة:
ممكن طبعا..
وعلى فكرة
كلامك دايما
بيضيف للمعنى !!
king tooot:
أشكرك على كلامك الكبير عليا اوى
واشكرك اكتر على تكرار الزيارة والتعليق
ويارب افضل دايما عند حسن ظنك
كراكيب نهي محمود:
هى فعلا جوائز السماء
وأى جوائز..!!
غني يا بهية:
عندك حق
هو مرض فعلا
بس مرض جميل
مزمن
نصاب به
ولا نرغب له علاجا..!!
اجندا حمرا:
الصديقة العزيزة
وحشتنى تعليقاتك بجد
كل سنة وانتى طيبه
واتمنالك دوام العشق والسعادة
رهف:
أشكرك على كلماتك الرائعة
ودعواتك الجميلة
واتمنالك دوام الحب والسعادة
إرسال تعليق